Uppsveitir Árnessýslu

Uppsveitir Árnessýslu eru fjölsóttusta ferðamannasvæði landsins og hvergi er fleiri sumarhús að finna.  Mikil uppbygging hefur verið að undanförnu á svæðinu og gestum og íbúum fjölgar frá ári til árs.  Ástæðurnar eru margar, hér eru rómaðar náttúruperlur og sögustaðir og náttúran óendanlega fjölbreytileg.  Aðgengi og nálægð við höfuðborgarsvæðið er kostur og það kemur mörgum skemmtilega á óvart hvað stutt er að skreppa í algera kyrrð og sveitasælu. Veðrið hefur líka verið uppsveitamönnum hliðhollt, milt og gott.

Fjölbreytt afþreying er í boði á svæðinu jafnt fyrir þá sem stoppa stutt og aðra sem kjósa að dvelja lengur.  Fjölmargar sundlaugar og golfvellir, hestaleigur, hestasýningar, veiði, fjórhjól, bátaleiga, hellaskoðun, snjósleðaferðir á Langjökul,  flúðasiglingar á Hvítá, skipulagðar gönguferðir og gönguleiðir, fræðslustofur, dýragarður, adrenalíngarður, litboltavöllur, gallerý, söfn og sýningar, kirkjur o.fl.

Náttúran er alltaf helsta aðdráttaraflið, en á undanförnum árum hefur áhugi ferðamanna á sögu og menningu farið vaxandi.   Gestir vilja gjarnan sjá og heyra hvað heimamenn eru að fást við.  Til að mæta þessum áhuga er m.a. boðið upp á heimsóknir fyrir hópa í garðyrkjustöðvar og á sveitabæi,  byggðar hafa verið gestastofur og ýmsar uppákomur skipulagðar. 

Skipulögð dagskrá er á Þingvöllum, Skálholti og  Sólheimum á sumrin. 

Ferðaþjónustuaðilar í uppsveitunum brydda gjarnan upp á ýmsum menningarviðburðum, bjóða upp á lifandi tónlist, myndlistarsýningar, skemmtikvöld af ýmsum toga, golfmót, óvissuferðir og afþreyingu fyrir fjölskyldufólk. 

Furðubátakeppni og traktorstorfæra á Flúðum og Grímsævintýri á Borg  ásamt Landnámsdegi í Þjórsárdal og Tvær úr Tungunum eru fastir liðir. 

Gistmöguleikar í uppsveitum eru af öllum gerðum;  tjaldsvæði, farfuglaheimili, bændagisting, gistiheimili, sumarhús,  hótel og fjallaskálar.  Og flestir hafa heita potta.  Fjölbreyttir veitingastaðir bjóða gestum upp á matvæli úr heimabyggð eftir því sem við verður komið enda eru uppsveitirnar mikil matarkista.

Svæðið er í senn gamalgróið og síungt ferðamannasvæði því ferskar hugmyndir koma fram á hverju ári.  Gestir og gangandi velja svo hvort þeir vilja  kyrrð, fróðleik, spennu eða sitt lítið af hverju.  Þess vegna  er auðvelt að koma aftur og aftur og upplifa alltaf eitthvað nýtt.  Hver árstíð hefur einnig sinn sjarma, ár og  fossar í klakaböndum, myrkur og norðurljós eða haustlitadýrð eru ekki síðri upplifun en  bjartar sumarnætur.

Allar upplýsingar um þjónustu og það sem er á döfinni í uppsveitum Árnessýslu má finna hér á vefsíðunni www.sveitir.is   og á  uppsveitakortinu sem kemur út árlega, en þar er þjónustulisti ásamt svæðiskorti.

 Verið velkomin.